1Cor 15 | BEF | STEP | Nalalu'nigita ka lamana'a alu lepugo keheli'ahabe. Ana kagamo aku'i lu lepilube. Giyaka giyaka fito lu lepugo lite lufusatini alolo hu'ehinamo ni'ibe.

1 Corinthians 15

Yesu fili'ehinaguti ho ti'ehinamofihi ka'a

1 Nalalu'nigita ka lamana'a alu lepugo keheli'ahabe. Ana kagamo aku'i lu lepilube. Giyaka giyaka fito lu lepugo lite lufusatini alolo hu'ehinamo ni'ibe. 2 Lenali ana ka lamana'a lu lenelepi'ohunamofihi li pili kete li'ehinogomo ya'ma le'mo ye ko sibina mehu'ehinogomo ya'ma, lenubuto bilube'mu hibe.

3 Mono ka tito ni'ina ka'a lu nimi'ehina'asigo lenali'i lu lepito ma luto lu lepi'ohube: Kilisitou lali foipanati'mu fili'ehina ya'ma mono bukugu ai ana hilibe lite koyapa'i emasana keye'ahanamo ni'ibe. 4 Filigo keli hete'ahana mono bukugu li mele'ahana kana'a loebe monebe keligu minoto mopo huto ho ti'ehina. 5 Ho tiloto kohe toto buto Pitahi huto hu be li'ehina, analoti buto Pita hiti pana'alobo luga'a 12 asagatoga huto hu enebe li'ehina. 6 Analoti bona'a naga'i 500 enali li nupa hite nehago analo huto hu enebe ligo be ge su he'ahana. Enalitogati asaga enubu hiti nehanaya mone'a fili'ahana ya'ma kanagu nokoyobe. 7 Analoti gona'a Yemesihi huto hu be li'ehina analoti aposolo asaga'i huto enebe li'ehina.

8 Alihi ya'ma nani mone fato kanagu neketo'ehina pana tegi huto nohugo huto hu nebe li'ehina. 9 Nani aposologuti limito nohube. Nani Kilisitohi naga'a kalana'i molo epoloto enohoto hu'ohuna bo aposolo yabe luto nigi'ni mololago nelesa'ni ligo nohube. 10 Nani aposolo lolo huto nani hapa'ni fato fato huto ni'ina yamofihi Hu'ma komopa'a hokolo hina bouba lu netago lolo hu'ohube. To ai komopa'a bati hina bouba aposolo lili'nalo nele'mo malago fa'mene lolo mehube. Nani foya li'ohuna yamofihi aposolo luga'a enebe ligito li'ohuna yabe. To nani hena'niloti lutine? Hu'ma komopa'a bati hinauba nanitoga minago li'ohube. 11 To nani foya lito lu huto huto lepi'ohuna ka ni'ifi to aposolo luga'amagi foya lite lu huto huto lepi'ahana ka ni'ifi, moneko ka ni'ibe. To lenali keheli ule'ale hi'ahana ka moneko'na ni'ibe. Fato fato ka meni'ibe.

Yesu fili'ehinguti ho ti'ehina'mu lali hiti ana huto ho tilune'mu hune

12 Kilisitou ya'ma fili'ehinaguti ho ti'ehina ka ma luto lu noleputogomo lenalitogati luga'amagi henabe luto fili'ehilana bona'i aku'i ho tilana meni'ibe lite lilata nehabe? 13 Ya'ma fili'ehilana bona'i aku'i ho tilana meni'ibe lite nelana kaga yamofihi lamana'a meni'ibe. Ya huto lamana'a ni'itita Kilisitou fili'ehinaguti ho metitine. 14 To Kilisitou ya'ma ho metitita mono ka noluta ya'ma fa'mene'mu lutogo lenali fa'mene'mu lenifita ite minatine. 15 To mone hiti ni'itita'mu yabe. Lali Hu'mamofi kumu lu'ohuta ya'ma ai'a Kilisitou fili'ehinaguti le'mo ho ti'ehinamo ni'ibe luto lulata nohutaya filise'naguti le'mo ho metise nasana ni'itita Kilisitohi Hu'mau le'mo ho metitine. To yamofihi kaga'a lu'ohuta ya'ma Hu'mamofi kumu lu'ohuta ka faga faga lutita'mu yabe. 16 Fili'ahana bona'i ho metilabe luto ka ya'ma lamana'a meni'itita, Kilisitohi le'mo ho metitita'mu yabe. 17 To Hu'mau ya'ma Kilisito fili'ehinaguti le'mo ho meti'ehina ka'a lamana'a ni'itita lenali lenifita neitita kagauba fa'menena lolo hitita'mu yabe. Hena'mube? Lenali foipanatini ya'manauba minatita'mu yabe. 18 To Kilisito kumu keheli ule'ale hilata nehana fili'ahana bona'i haya kalatita'mu yabe. 19 To lali Kilisitou yatai ma melugu nohuta kana'asigoko lele'mo bati hilina ni'itita bona'i luga'a asaga'magi lali kumu kehelite keke'i nelinogo ate ate luto minotita'mu yabe.

20 To ya huto meni'ibe. Kilisitou ya'ma lama'naka fili'ehinaguti aho ti'ehina yabe. To ho notito fili'ahana bona'i ana hite tilabe luto kohe toto ti'ehina. 21 Ya'ma hapa'amofihi ma ni'ibe. Bo mone Atau ai fililata nasana le'mo kohe to letoto fili'ehina ana suhi huto fato bo moneuba Kilisitou fili'ehilutaguti ho tiluta nasana le'mo kohe to letoto ho ti'ehina. 22 Lali asaga'i Atahi naga'a nohuta yagi asaga'i fili su haluta'a huto nohune. To ana suhi huto lali Kilisitohi naga'a nohuta bona'i asaga'i keliguti ho ti su halutamo ni'ibe. 23 Fi lehe tete ho tilabe luto lu leto'ehinalo ho tilune'mu hune. Kilisitohi le'mo kohe to letoto ho ti'ehinamo ni'ibe. Alina kana'alo ya'ma ai naga'a lali ho tiluta'mu yabe. 24 Analoti aliha'a minoto asaga'na su halina kana'a huto hilibe. Ana kanagu Yesu ai'a enigihiti bo to sipi kaba bona'i hiti to Satahi amuya bo'a enali amuya lelito limi su holoto ya'ma me'i kai kapoka yabe luto afotifu Hu'mamofihi yanugu melelenogo kaba nohinogo kana'a su halina'mu yabe. 25 Yatai ya'ma Kilisitou foya'a lito kaba huto mino lito nobinogo Hu'mau fateha'amagihi gi fehupa'aga enele'mo malago foya'a li su halube'mu. 26 Ya huloto yalo fatehati bo sipi'a ho fililube'mu hibe, gi'a ya'ma filise nasana yabe. 27 Yamofihi mono bukugu ma lite fayahi keye'ahanamo ni'ibe:Hu'mau bona'i hiti to ana'ina asaga'i ya'ma ai'a gigusa'aluga lele'mo molo su halina'mu yabe.Ana ka ya'ma kehelilete Hu'mamofi kumu hiti lu'ehina kaga ni'ifihe lite mekehelilo. Hu'mau ai'a Kilisitohi gigusa'aluga lele'mo nupa hulata nohibe. Ai ya'ma Kilisitohi gigusaluga meminalina'mu yabe. 28 Hu'mau ai'a bona'i hiti to ana'ina silaga'i ya'ma pana'amofihi gigusaluga lele'mo nupa hinogo pana'auba ai afo'afihi gigusaluga minoto agoya hu etalibe. Ya hulenogo afo'afu minomo tito lebe ligi su halina'mu yabe.

29 Lenalitogati luga'amagi fili'ahana bona kumu yabe lite mono nagami'i felelata nehabe. Fili'ohutaguti ho tiluta'a meni'itita ya'ma henabe lite nefalabe? Lenali fili'ahana bona'i luga'amu lenegekesa kehelite nagami'i folo epolo'ahana, keliguti ho tilata'a meni'itita henabe lite ya hi epelelata habe? 30 To fili'ohunaguti ho tise nasana'mu keheli amuya memolo'ohutita nani henabe luto ya'ma noho fililuta nasanamofihi gupisalo keta'a hiti asaga yupahi nominobe? 31 Nalalu'nigita, Sipi Boti Yesu Kilisitou ai'a nani lili'nagu lenele'mo molo'ehina yamofihi keheli'ohuto'ni Hu'mamofihi bulo ma luto nolube kana'amu kana'amu fililuta nasanauba lifito ago nominobe. 32 Nani ya'ma Efeso hepatoga lopi yagakafa legi hite nehana bona'i hiti luba fito mino'ohuta yabe. To bona'magihi ka'aniya nani ya huto fililuta nasanalugu mino'ohunamomu'i ya'ma henana lamana'a huto hu nimilibe? Fili'ohutaguti ho tilata meni'ilina yamofihi nani ya huto mino'ohunanauba fa'menena lolo hilibe. To fili'ohutaguti ho tilata meni'ilina'a yamofihi lenalitogati bona'i luga'amagi ma lite ligo bati hitine: Yago fililuta ni'igi yatai nose'na yaga hoto nagami'i hiti laba lona noto minalune.

33 To ya huto meni'ibe. Bona'i mone'amagi ya'ma kaga lilata enali lenele'mogopa hi lalagi ya'ma enali ka'anilo nolube. Sibi humofa'na nehana bona'magitoga bite i ke'malana bona'magi enali komopa'anigu ana hite sibina hilana'mu yabe. 34 Lenali ya'ma komopatini hokolo hinogo eto hite nehite foipa nasana lenemegesa hi emilo. Lenalitogati bona'i luga'amagi Hu'ma kumu menekehelibe. Yamofihi fa'mene kehelinogo lenubuya hilibe luto nolube.

Filise'naguti lugufati kosaba'i lolo hinogo ho tise nasana

35 To luga'amagi ma lite lilabe: Fililago pata si'ehina bona'i enali hena hena hite ho tilanabe? To enugufa enokaba henana tegi hinogo huto hilabe? 36 Ya'ma kaga sibigopa negi ka nelabe. Lenali nose'na notina hapa'a nekehelifiye? Lenali nose'na bigaha'a lite he kefelata nehanamofihi fa'mene ana'asi tilina meni'ibe. Filito sekuya biloto yalo boloto tilata nohibe. 37 Biha'a nasana ya'ma fato suhi huto ni'ibe. To nose'na ya'ma fato huto ni'ibe. Moneko okaba hiti meni'ibe. To legeya'a kile'i ni'ina to fato nose'na ni'ina biha'ago he kololata nohune. To he kololotogo notina'a haya'a hiti ya'ma aliha'a huto hulata nohibe. 38 To Hu'mau ai keheli fe luloto lu eto'ehina'a huto gufa'a emi'ehinalo ana suhi huto boloto tilata nohibe. To legeya'a ana huto noha'a ana suhi huto fato fato'mofihi huto hulata nohibe.

39 Lugufamofihi hapa'a ana huto moneko'i meni'ibe. Bona'magita lali lugufati ana huto fato'i to yagakafamagihi enugufa fato'i, to namamagihi fato'i, to faya'magihi ana huto fato'i ni'ibe.

40 Kokulumagu nasana silaga'i ni'ina to metoga ana huto ana'ina silaga'i ni'inaya, kokulumagu nasana silaga'i ni'inamofihi sekele mamu'a fato'i to metoga ni'ina ana huto sekele mamu'a fato'i ni'ibe. 41 Yegemofihi silikeha'a fato'i, ikahi ai silikeha'a fato'i, sonofi'i enali ana huto silikeha'ani fato fato ni'ibe.

42 Filise'naguti ho tilatanamofihi hapa'a hiti ana suko huto ni'ibe. Lugufa keli halatana yamofihi fa'mene pata sise'na ni'ibe. To lugufa gololo tilina'a yamofihi pata mesise minoba minoba huto su mehalina'mu yabe. 43 Keli hose'na ya'ma futu'a ni'ibe. Gololo tise nasana ya'ma silikeha'a hiti ni'ibe. Keli hose'na ya'ma lapa mebinana ni'ibe. Gololo tise'na ya'ma amuya'a hiti ni'ibe. 44 Keli nohota nasana ya'ma me'mofihi lugufamo ni'ibe. Gololo tise'na ya'ma kokulumamofihi lugufati ni'ibe. Me lugufa ni'ina ana huto kokulumagu lugufamo huto hilibe. 45 Ya hu'ehina'mu mono bukugu ma lite fayahi keye'ahanamo ni'ibe: Yege bo Atau ya'ma meha'a hiti lolo huto minolata hu'ehinamo yanamofihi afo'afu lolo huto mino'ehina. To aliha'a Ata tegi bo gi'a Yesu ai'a amuya moloto minoba minoba hilutanamofihi afo'afu lolo huto mino'ehina. 46 Ya huto ni'inaya kokulumaguti lugufa kohe toto huto hilina meni'ibe. Metoga lugufamo ya'ma kohe tolago kokulumaguti lugufa ya'ma alihi huto nohina yabe. 47 Kohe toto melugu bo Atau ai ya'ma metoti lolo hu'ehina, ya hu'ehina'mu luto melugu bo mino'ehina. Alihi Ata tegi bo Yesu ai ya'ma kokulumaguti bo limito mino'ehina. 48 Melugu bo mino'ehina babeyafa huto metogati yagapana'a nohune. To kokulumaguti bo mino'ehina babeyafa huto kokulumaguti nasana lali minalune'mu hune. 49 To metogati ai meha'a li'ohuta ana huto kokulumagu bomofihi ai meha'a lilune'mu hune.

50 Bogiyo, kaga mone'ya lilugi kehelilo. Me lugufatu Hu'mamofihi kapogu mebiluta'mu yabe. To fulupa ito fa'menena lolo hilina lugufauba nasana amuya'a hiti minoba minoba huse nasana mone melilinamo ni'ibe.

51 Kehelilo. Nani suguna ka mone lu lepilugi. Lali mone'a fili su mehaluta ni'inaya asaga'i nominana'a hiti fili'ahana'a hiti lali fa'mene li gelehe huto kosaba lugufamofihi asaga'i lito i kololo bi su halutamo ni'ibe. 52 Aliha'a su halina kana ufepo neinogo fili'ahanamagi ho tilete fulupa ite tuguma'i mebilana'a minalana'mu yabe. To lubu noha'a fili koto nohiluta'a hiti mele'isi i gelehe huloto fato lugufa lito i kololo bilutamo ni'ibe. 53 Lugufa ya'ma fulupa ito tuguma'i bilata nohina nasanauba amuya moloto minolata nohina nasana ya'ma gukete suhi huto lito i gololo tilube'mu hibe. To filise'namofihi lolo hu lalutigi minoba minoba nasana lito i gololo bilibe. 54 To fulupa ilata lugufauba minoba minoba huto minose'na lito i kololo bilina yupahi kaga ma luto mono bukugu koyo'ehinamo huto hilube'mu hibe:Minoba minoba nasanauba fililata nasanamofihi be ligi'ehinamo ni'ibe. 55 To ka mone hiti ni'ina:

Fililata nasana
kai loho fililata nohata
amuyaka hiya ni'ibe?
Fililata nasana kai ufehakatu
lele'mo lagabu'i gise nasana
hiya ni'ibe?

56 Foipa nasanauba ya'ma fililata nasanamofihi ufehe neka'a lolo hu'ehibe. To keya ka li'ahana kaga'mu yabe luto foipa nasanauba lelepito amuya hiti lolo hu'ehinaya Hu'mau ai Sipi Boti Yesu Kilisitohi lu emilago foipa nasana be ligilata nohina amuya limilata nohinagi, ya'mu fokehi nolune.

58 Ya hu'ehina'mu nalalu'nigita, lenali amuya melete ho ti kibi kibi hite ule'ale hite minalo. Ya nehite Sipi Bomofihi foyagu kana'amu kana'amu amuya melete lelite bilabe. Sipi Bomofi kumu yabe lite foya'a lelite binogo buto fa'menena lolo mehilibe lite nekehelite lilo.